一個〈偽〉財經演員的台詞

主持人：各位，歡迎收聽「蘑菇自強運動」特約《財經你又睇》。
今日港股重上2萬2千點，道指已經到1萬點，油價金價創今年新高。
巿場似乎已經回復金融海嘯前水平，咁究竟嚟緊個巿應該點睇？
咪就係一係睇升，一係睇跌囉。
我都知呢句係廢話，所以今日我地就請咗嘉賓乜先生上嚟傾兩句…
乜先生，你好！
乜先生：主持人，你好！
主持人：咁究竟點睇個巿呢，會唔會有金融海嘯第二波？
乜先生：依家簡直係極度非常時期！
主持人：又係非常時期？上次你已經話今年年頭係非常時期……
乜先生：咁你上次有冇聽我講喺1萬1千點水位買股票買豪宅呀？
主持人：乜先生，你真係識講笑，我邊有錢買……唔，講番呢個非常時期，因乜解究咁非常？
乜先生：大戶睇法各走極端……股神、誠哥全面大好友，有人話明年仲會升上3萬點添，嘈超人就全面唱淡，又話大熊會出現，四uncle仲話由2萬點開始沽貨沽到2萬5千點。而家就睇你企邊度啦。
主持人：咁你又點睇？
乜先生：我地做緊出街節目，梗係要客觀持平。我只可以話我冇沽到貨，講完。
主持人：唔係喎，阿八叔同大師都話啲陰陽燭出現咗三個死亡十字架喎……
乜先生：總之現階段我唔會沽貨啦……
主持人：嗱，咁各位觀眾收到乜先生的「訊息」啦…有家庭聽眾問現階段應唔應該高追獅子銀行喎…
乜先生：呢隻不嬲都係師奶愛股，買又得，唔買又得…因應自己啲能力啦…
主持人：又有人問油價係咁升，係咪應該買857同386…
乜先生：買呢啲不如就買股神新寵1211啦…
主持人：嘩，呢個究竟係神話定山埃，咁就拭目以待。好，今日《財經你又睇》時間又差唔多，下次再見！

〈本節目純屬個人「吹水」，如有雷同，實屬巧合。另外請留意：投資涉及風險，股票價格可升可跌，過往之表現不能作為將來表現之指引。〉