《財經你又睇》part 2

主持人：各位，歡迎再次收聽「蘑菇自強運動」特約《財經你又睇》。
呢個月嚟港股都係飄忽不定，一時又跌穿22000點，一時又差啲hit到23000點。金價曾經迫近每盎司1200美元，美滙指數又徘徊喺74至75較弱的水平。新股方面，1988一上巿就已經跌穿招股價，令到好多內銀股粉絲都跌晒眼鏡。依家連中東佬都話唔掂，杜拜世界面臨破產，究竟後巿應該點睇呢？
原本我地諗住請節目的御用嘉賓乜先生親自上嚟解畫，但係呢幾日我地都同佢聯絡唔到……等等，我地既工作人員終於接通咗佢既電話。喂，乜先生？
乜先生：你好！
主持人：我地好多聽眾近日都留言話聽唔到你既聲音，都好關心你。又有網上討論區流傳你前幾日留低咗個一句話之後就人間蒸發，究竟你係唔係避世呢？
乜先生：我冇事，係有些少煩惱，不過大致上都ok，請大家放心。
主持人：係咪因為上次你講嗰隻1211由60幾升到80幾然後又插水返到60幾而耿耿於懷呀？
乜先生：…係有啲失望，不過理性話俾我知，呢隻1211應該冇問題，我對佢同後巿都保持審慎樂觀…
主持人：坊間都喺度估杜拜問題會唔會觸發金融海嘯第二波…你仲對後巿有信心？
乜先生：應該唔會太差。話時話，其實我都頗欣賞聯儲局的Bernarke，就現時情況來看，佢啲貨幣供應政策控制得宜，應該不會引發通脹，加上如果保持低息的話，會有利營商，美國經濟應該唔會太差。
主持人：咁八卦啲問吓乜先生你近排搞緊啲咩嘢？
乜先生：都係靜靜地睇吓書，近排研究二次大戰的歷史。
主持人：咦，我地都以為你韜光養晦，秘密研究買邊隻股票好添…
乜先生：其實現時個巿都冇邊隻股票係特別便宜，都可以暫時放手做其他嘢，更何況股票並唔係人生啲全部。
主持人：好，既然連乜先生都話要做其他嘢，咁我地都放吓假先。好，今日《財經你又睇》時間又差唔多，下次再見！

〈本節目純屬個人「吹水」，如有雷同，實屬巧合。另外請留意：投資涉及風險，股票價格可升可跌，過往之表現不能作為將來表現之指引。〉